mánudagur, júlí 31, 2006

Ferð á Miðjarðarhafi














Allar myndir eru á myndasíðu:


http://community.webshots.com/user/bergurogrannveig/

Þá rættist gamall draumur hjá Benedikt. Allt frá því við horfðum dreymandi augum á arabasnekkjurnar í Cannes í fyrra hefur Benedikt oft talað um það hvað það væri gaman að fara í sjóferð. Því ákváðum við að eyða öðrum helmingi frísins okkar um borð í MS. Norska gimsteini. Þetta er svo stórt skip (300 metra langt) að það má líkja þessu við það að allir íbúar Álftaness væru gestir og aðeins fleiri en Siglfirðingar að þjóna þeim. Hér á eftir fer stutt ferðasaga en engin ábyrgð er tekin á sagnfræðilegum fullyrðingum í þessum texta og er ekki talið viturlegt að hafa eftir í samtali við fólk sem hefur eitthvað smá vit á sögu Ítalíu og Rómaveldis.

Nú hvað um það, lagt var í hann frá Barcelona og siglt í einn og hálfan dag á sjó til Sikileyjar þar sem ferðinni var heitið upp á Etnu, stærsta eldfjall Evrópu. Nú þetta var gríðarleg fjallganga enda var búið að vara hjartveikt fólk að fara ekki í þessa för. Rútan keyrði okkur upp í 2000 metra hæð og svo fórum við um borð í Unimog sem keyrði okkur upp næstu 1000 metrana. Við rétt mistum af eldgosi sem hafði lokið tveimur dögum áður en við létum það ekki á okkur fá. Við fengum aðeins að labba með ítölskum fjallaleiðsögumanni sem sagði okkur frá svæðinu. Þetta var ansi magnað og gaman að sjá hvað loftþrýstingurinn var lágur uppi á fjalli (sjá mynd af flöskum þar sem vinstri flösku var lokað uppi á fjallinu áður en við fórum niður). Svo fórum við niður aftur og sigldum um kvöldið og nóttina til Napólí. Á leiðinni til Napólí var skipstjórinn svo elskulegur að sigla fyrir okkur fram hjá Strombólí sem er búið að gjósa síðustu tvö þúsund árin. Við náðum nú ekkert sérstökum myndum en eina má sjá á myndasíðu.
Fyrst við vorum byrjuð á þessu eldfjallaþema var ekki úr vegi að halda áfram og á þriðja degi ferðar fórum við upp á Vesúvíus og skoðuðum Pompeii. Þetta var álíka þrautaganga og á Etnu, rútan fór með okkur nánast upp á topp og við gengum svo síðasta spölinn. Okkur til sæmdar má nefna að það var 35 stiga hiti þennan dag og það var svo sem ekkert grín að labba miklar vegalengdir. Nú Vesúvíus er alveg afskaplega fallegt fjall og útsýnið þaðan nú bara ekkert svo slæmt. Ítalinn kann nú greinilega sitt fag því uppi á gígbarminum voru þrjár túristasjoppur og þar keyptum við okkur ískalt kaffi og héldum svo aftur niður. Þegar niður kom var haldið áleyðis til Pompeii en hún grófst undir ösku í gosi frá Vesúvíus árið 79 eftir Krist. Pompeii var nokkuð stór kaupstaður með um 20 þús. íbúum en í gosinu dóu um 60% þeirra og þeir sem lifðu af fluttu í burtu eftir gosið og borgin gleymdist í 1500 ár en fannst svo fyrir slysni. Það má í raun segja að þetta sé ekki besta bæjarstæði í heimi því aðeins um 20 árum fyrir gosið hafði öflugur jarðskjálfti riðið yfir og lagt stóran hluta borgarinnar í rúst. En rómverjar voru praktískir og hafði tekist að endurbyggja mikinn hluta borgarinnar með því að plástra í ónýtar byggingar og súlur með múrsteinum (sjá myndir). Á myndum má einnig sjá afsteypur af fólki sem dó í eldgosinu. Atburðarrásin var nokkurn vegin þannig að sjóðandi heit eldfjallaaska kom á fullu skriði niður fjallshlíðarnar og gróf bæinn að fullu. Fólk var því í raun grafið á einu augnabliki. Síðan harðnaði askan utan um líkama fólks. Síðar rotnuðu líkin í burtu og eftir sat beinagrind inni í holrúmi sem hrundi ekki saman vegna þess að askan hafði harðnað. Í uppgreftinum datt svo einum spekingnum í hug að hella gifsi inn í holrúmin og brjóta svo öskuna utan af. Þannig fengust nánast fullkomnar afsteypur af íbúum bæjarins. Að Pompeiiför lokinni var aftur haldið í skipið og siglt til Civitavecchia nálægt Róm. Við ákváðum að gefa Róm frí í þetta skiptið þar sem við sáum að við myndum eflaust ekki ná mjög yfirgripsmikilli sýn á borgina með því að vera þar í 6 til 8 tíma og við lágum því í móki á skipsdekkinu allan 5 dag ferðarinnar.
Á sjötta degi ferðar vorum við í grennd Pisa og því fórum við í stutta ferð þangað og fórum svo eyddum svo afgangi dagsins á ítalskri baðströnd. Nú ýmsir vita að í Pisa er skakkur turn. Turninn ásamt fleiri byggingum voru byggð af íbúum Pisa á 11 og 12 öld að mig minnir til að monta sig á að hafa stolið Arabagulli í sjóránum. Turninn var hannaður og byggður undir forystu heimamanns en hann ráðfærði sig ekki við jarðvegsfræðinga sem hefðu getað sagt honum að fúafen eru illa til þess gerð að halda uppi montsúlum úr marmara og ekki tókst betur til en að hann fór að síga á fjórða eða fimmta ári smíðinnar og voru því einungis byggðar fjórar hæðir í fyrstu lotu. Síðan kom langt hlé en næsti arkitekt (einnig heimamaður) hélt áfram smíði turnsins og í þetta sinn var hann réttur af. Árið 1990 eða 91 var honum svo lokað fyrir almenningi vegna ótta um að hann myndi hrynja. Heilmiklar lagfæringar eru búnar að fara fram á turninum á síðustu árum en við fórum ekki upp því aðeins það fá einungis 30 manns að fara upp á hálftíma fresti og það þarf að panta og blablabla þannig að það verður kannski bara gert seinna. Það þarf kannski ekki að taka fram að í Háskólanum í Pisa er hægt að læra allt milli himins og jarðar nema arkitektúr. Eftir heimsókn í Pisa fórum við á strandklúbb og lágum þar í nokkra tíma. Þetta var heilmikil bökun sem endaði á að Alexander fékk indverskt tattú og var hæst ánægður töffari. Um kvöldið var svo siglt áleiðis til Frakklands. Þetta kvöld var haldið “Chocholate Midnight Buffet for Chocoholics”. Þetta var reyndar svolítið svindl þar sem það var bannað að borða Eiffel turninn og fleiri þekkta staði.
Síðasta degi ferðar eyddum við með stuttu stoppi í Mónakó. Við skoðuðum höllina hjá Prinsinum og hluta formúlubrautarinnar. Utan við spilavítið í Monte Carlo drukkum við svo dýrasta bjór sem við höfum smakkað en það var svo sem allt í lagi því hann var bara nokkuð góður í 30 stiga hita. Á leiðinni til og frá Mónakó keyrðum við fram hjá húsum Bono, Tinu Törner, Elton John, og einhverjum fleiri spekúlöntum. Við vorum alveg upprifin af nálægðinni við stjörnurnar og eigum eftir að lifa á þessari upplifun lengi J.
Dagurinn í Frakklandi var stuttur og um þrjú leitið var siglt til áleiðis til Spánar og við komum svo heim í hina margrómuðu Aberdeen í gærkvöldi.

Þannig er nú það í pottinn búið, förum til Glasgow að skila ormunum til pabba síns til Íslands á morgun og svo við tvö til Parísar að hitta Helenu og Davíð 2 vikum áðue en þau flytja til LA - USA. Hver veit nema við skoðum eitthvað fleira en Zara, Top Shop og H&M þar þannig að það verði hægt að vera með aðra ferðasögu.

fimmtudagur, júlí 20, 2006

Nýjar myndir !!!!!

eru komnar á:
http://community.webshots.com/user/bergurogrannveig/
Þetta eru myndir frá hinum ýmsu viðburðum í lífi fjölskyldunnar undanfarið.

Einnig eru komin tvö vídéó af strákunum frá því þegar skólinn setti upp söngleikinn Jósef eftir Sir Andrew Loyd Webber með miklum tilþrifum. Benedikt lék jósef þegar hans bekkur var á sviðinu en Alexander lét sér nægja að styðja við bakið á Jósef í sínum bekk.

http://www.youtube.com/watch?v=RJX2D7_48ts

http://www.youtube.com/watch?v=1npjwfYd4pE

föstudagur, júlí 14, 2006

Það hafa þeir fullorðnu sem fyrir þeim er haft



Á ísköldu vetrarkvöldi í nóvember síðastliðnum vorum við norpandi niður í bæ eitthvað að sýsla. Töluverðs pirrings gætti í hópnum vegna kuldabolabits og almennar þreytu. Þetta var á hinum fróma vegi School hill. Þá varð Alexander litið inn um gluggan á mikilli búð er Games Workshop heitir og í glugganum sá hann Lord of the rings kalla og hina og þessa stríðskalla. Nú morðtól og ævintýraverur kalla að sjálfsögðu á unga drengi og fórum við inn í þessa búð. Og það var ekki aftur snúið, eftir þetta gengur flest hjá Alexander út á Warhammer 40000 sem er innpakkaður ævintýraheimur fyrir börn á öllum aldri. Hann er búinn að vera að safna Space marines og er þjóðflokkur sem kallast "Salamandras" en það mætti líkja þeim við blending af þeldökkum manni og ráðagóða róbotnum (Short Circuit- ef einhver man eftir honum). Í búðinni er hægt að líma og mála kalla og uppi á lofti eru spilaborð fyrir viðskiptavini. Nú þeir kalla nú ekki allt ömmu sína þeir sem reka þetta batterí enda er boðið upp á ókeypis námskeið fyrir hugsanlega og nýja neytendur þar sem þeir eru veiddir inn í leikinn.

Nú eins og margir vita er Alexander ekki fullorðinn og höfum við því þurft að skiptast á að fara með honum þegar eru spilaeftirmiðdegi. Þetta hefur orðið til þess að ég hef þurft að finna mér eitthvað til dundurs og er byrjaður að safna Orkum en þeir eru ofbeldisfyllstu kvikindin um víða veröld en enn sem komið er nær alexander alltaf að slátra mér. En bíðum og sjáum.




Mannskapurinn vaninn við spilaborðið


Heil borg úr klósettrúllum


Alexander hefur stundum verið með Benedikt í vinnu við að grunna kalla

Nýbúinn að kaupa Liðþjálfa með tvöfalda "plasmacannon" og "wide bore destroyer pistol"

miðvikudagur, júlí 12, 2006

Útskýring

Vegna miskilnings sem virðist vera uppi meðal lesenda síðunnar telur ritstjórn rétt að árétta hvað er átt við með orðatiltækinu "autosampler" eða sýnamatara .

Slík tæki má til dæmis fá fyrir lítinn pening á ebay og geta þau gert fólki lífið auðveldara fyrir inni á rannsóknastofum með því að raða sýnum sjálvirkt inn í efnagreiningartæki.

Nú verður gripið niður í auglýsingu fyrir íhlut í sýnamatara á ebay:















Þetta er 18 sýna snúningsbakki. Hann lýtur út fyrir að vera hannaður til að kæla eða hita sýni eða úr gömlum sýnamatara en skilgreindur tilgangur er ókunnur. Þessi eining hefur átján hólf mert 0-17. Glösin fylgja með. Einingin er í góðu standi en óvíst er um hvort hún virki. Glösin eru í góðu til framúrskarandi ástandi. Gjörið svo vel að bjóða af visku og gangi ykkur vel.

...Fleira var það ekki að svo stöddu

mánudagur, júlí 10, 2006

Sitt lítið af hverju


Já ég veit, erum mjög lélegir bloggarar. Það er bara svo mikið að gera hjá okkur að þegar frítími gefst er bara öll "blogg-orkan" búin. Höfum samt ákveðið að vera duglegri við þetta, fyrst það voru jú við sem tókum þá ákvörðun að byrja að blogga, þannig að ekki gefast upp, halda áfram að kíkja á síðuna við og við.

Af Aberdeen Háskóla er það að frétta að útskriftir eru framkvæmdar hér í massavís með tilheyrandi koktelboðum í lystigarði háskólans. Þetta fer ekki fram hjá okkur Bergi, því deildin okkar er staðsett í miðjum garðinum. Ekki nóg með það heldur fékk Joanne Rowling (sést á meðfylgjnadi mynd), höfundur Harry Potter bókana alveg sérstaka viðurkenneningu (Doctor of Laws) fyrir framúrskarandi störf bæði í þágu ritsmíða og stykja til MS rannsókna í læknadeildinni við Aberdeen Háskóla. Við erum að vonum mjög stolt af þessum afrekum hennar og af þeim fallegum ummælum sem hún lét falla í garð háskólans og voru þau eftirfarandi:

“I am extremely honoured to be receiving this Honorary Degree from such a distinguished Scottish University, with such a dynamic international reputation". (Er þetta ekki yndislegt).

Af náminu er það að frétta að allt gengur vel. Er núna að vinna úr einni tilraun sem ég er búin að vera með gangi frá því í mars og merkilegt nokk, þá er ég bara með þessi fínustu gögn. Ég persónulega hafði enga trú á þessu hjá mér og því er ég alveg sérstaklega hamingjusöm yfir þessu. Alltaf gott þegar maður býst við engu en fær svo smá...Þetta kemur sér líka mjög vel því ég er nú á fullu að skrifa skýrslu úr öllu því sem ég er búin að gera því ég er að fara í munnlegt próf, svona "mini-vörn", með "2 internal examiners" sem munu að lokum meta hvort ég sé hæf til að halda áfram í doktorsmámi. Svo er bara stefnan á að skrifa 2 pappíra þegar ég kem heim í lok ágúst sem ætti að vera lokið um jólin. Þá verð ég bara nokkuð langt á veg komin með þetta nám mitt held ég nú barasta.

Nú nú, Bergur tekur öllu með jafnaðargeði, fær aldrei nein stressköst eins og ég (enda ekki kona) og framleiðir gögn eins og hann fái borgað fyrir það (humm, reyndar fær hann borgað fyrir það) og er á áætlun enda mikill skipulagsmaður (ég kalla hann stundum litla "ofur-auto-samplerinn minn" - smá lókal rannsóknastofu húmór).

Já svo er náttúrulega frá því að segja að við Bergur fórum í BBQ veilsu um daginn. Þar var mjög gaman og svo sem ekkert fréttnæmt um hana að segja, nema kannski frá einu sem ég er enn ekki alveg viss með hvort ég eigi að vera ánægð með eða fara í tilvistarkreppu út af.

Þannig er mál með vexti að ég skemmti mér bara stórvel, var í góðu skapi og skemmtileg tónlist í gangi. Svo skemmtileg þótti mér hún að ég hafði orð á því við gestgjafann sem sagði "Oh thanks, you must be such a cool mum". Þá kemur stóra spurningin. Þýðir þetta að viðkomandi finnist ég vera svo mikil kelling vegna þess að ég er tveggja barna móðir að ég ætti bara að hlusta á einhverja Broadway söngleiki eða á Barböru Straisand eða er ég bara svona cool pæju mamma. Er ekki viss...þarf aðeins að melta þetta áfram. Melti melti melt... er enn ekki viss...

Svo ætla ég bara að enda þetta blogg á verðlista sem hangir upp á vegg í "tearoom-inu" okkar upp í skóla. Mér finnst hann nokkuð skondinn og vildi fá að deila honum með ykkur lesendur góðir (ef einhverjir eru eftir)

Tearoom Price List

Posh Food
Devine Chocolate
Chocolate ginger buscuits
Shortbread
Maya Gold

Middle Class food
Tea (from the pot)
Apricots (organic, 100g)
Mango (organic, 50g)
Sesame bar (organic)
Crisps (large and small)
Banana chips
Yoghurt coated raisins
Mint Chocolate

Working Class Food
Twix
Bounty
Crunchie
Nuts
Kit Kat
Cheddars
Flapjack
Mixed nuts & raisins

Tillydrone fud (food) - Tillydrone er eitt af glæpahverfunum hér í Aberdeen, þar sem hægt er að finna "needle bins" inn á leikvöllunum svo litlu börnin séu ekki að leika sér með heróin nálar í sandkassanum
Pot of noodle
Carlsberg
Lollipops